Anguaño, namás tán pendientes d'oficialización les formes toponímiques tradicionales de 4 conceyos: Ayande, Cuideiru, Ibias y Navia
03 may 2024 . Actualizado a las 09:45 h.Consultar el nome xeográficu de los conceyos yá ye una realida. A lo menos, pa 63 de los 78 conceyos asturianos. El catálogu, que puede consultase na web, recueye 620 parroquies, 63 capitales de conceyu, 42 núcleos urbanos, 20 urbanizaciones, 31 barrios urbanos, 4.160 pueblos, aldegues y barrios; 5.135 barrios interiores, 5.590 quintanas y 980 llugares. En total, casi 17.000 topónimos. Esta ferramienta anunciase nel marcu de la Selmana de les Lletres Asturianes.
El conseyeru d'Ordenación del Territoriu, Urbanismu, Vivienda y Derechos Ciudadanos, Ovidio Zapico, destacó que la toponimia ye un llegáu cultural que nun se pue perder y ye un actu de sofitu de la so conseyería a los idiomes d'Asturies por ser el noménclator una manera de contribuyir a «avanzar na so normalización y a que pueda emplegase con normalidá total la toponimia como s'usó siempre nesos llugares».
La conseyera de Cultura, Política Llingüística y Deporte quixo agradecer el «trabayu inmensu del Serviciu de Cartografía» pa sacar alantre esta ferramienta y punxo en valor «la importancia de la coordinación ente los departamentos». Xunto a ello, anunció que va aniciase'l procesu d'oficialización del nome de los conceyos asturianos. «Va oficializase tamién la toponimia menor que fai referencia a los ríos, montes y accidentes xeográficos».
Esta anuncia ye un añedíu más al decretu de la oficialización de los topónimos de les entidaes de población, tres entender el Serviciu de Cartografía la la relevancia y la necesidá de llocalizar los topónimos oficiales nel mapa, al tratase d'una información básica y pol altu valor patrimonial ya identitariu que supón.
Esi llabor entamó nel añu 2018, cuando'l Serviciu s'enfrentaba a xeollocalizar y organizar de manera territorial 23.944 topónimos oficializaos en tol territoriu asturianu. Tres más de 5 años de trabayu, llocalizáronse 16.641 topónimos de 63 municipios. D'ellos, 11.214 nun tán reconocíos como entidaes de población pol INE (Institutu Nacional d'Estadística) y cerca de 12.000 correspuéndense con llugares de tamañu inferior a pueblos o aldegues (quintanes, cases, barrios urbanos, barrios interiores...). Topónimos que son mui abegosos de llocalizar y que na mayor parte de les veces namás los conocen los vecinos.
Anguaño, namás tán pendientes d'oficialización les formes toponímiques tradicionales de 4 conceyos: Ayande, Cuideiru, Ibias y Navia. En casu d'una oficialización per parte de los equipos de gobiernu d'esos conceyos, van incluyise nesti Noménclator.