Barbón afirma qu'Asturies tien un problema de «autoestima» y tovía hai que lluchar contra «remolones d'identidá»
AGORA
El presidente destacó que paez que «la política mediática d'esti país quier que too xire, principie y acabe alredor d'esa M30, alredor de Madrid y yo contra eso rebélome tamién»
25 abr 2024 . Actualizado a las 10:17 h.El presidente del Principáu, el socialista Adrián Barbón, afirmó qu'Asturies tien un problema de «autoestima» hacia la so propia identidá y, tovía güei, «tenemos que lluchar con aquellos que siguen remolones en cuantes a esa conciencia d'identidá».
Barbón recibió nel Palaciu de Presidencia a Xuan Xosé Sánchez Vicente, Xosé Lluís García Arias y Lluís Xabel Álvarez, fundadores del colectivu Conceyu Bable, al que se va rindir tributu na 45 Selmana de les Lletres Asturianes. Al alcuentru tamién asistió la conseyera de Cultura, Política Llingüística y Deporte, Vanessa Gutiérrez.
Nesi sentíu, en declaraciones a los medios, el presidente señaló que la herencia mayor de Conceyu Bable foi «la conciencia d'Asturies y de la so propia identidá». «Asturies tien un problema, que lo tuvo siempre y que yo llevo lluchando contra él desque asumí la presidencia va facer cinco años, que ye'l tema del autoestima, la mesma identidá, l'autoidentidá y esi arguyu d'identidá que yo creo que foi la herencia mayor que dexó nesti casu Conceyu Bable y que tovía güei, agora, tenemos que lluchar con aquellos que siguen remolones en cuantes a esa conciencia d'identidá», indicó.
Barbón destacó «l'arguyu» que supón recibir a los trés fundadores de la organización clave na Transición na defensa de la llingua, la cultura y l'autogobiernu d'Asturies y señaló que tanto Sánchez Vicente, como García Arías —que recibió la Medaya d'Asturies en 2023— y Álvarez «tán operativos dafechu, siguen opinando, siguen faciendo reflexones que tienen que ser crítiques por naturaleza y que nesti casu, n'Asturies, tenemos que tener mui en cuenta».
Asina, indicó que la xunta colos padres de Conceyu Bable supón «reivindicar una vez más que, frente al pesimismu, ilusión siempre, y que, frente a esa crisis d'identidá, arguyu, arguyu de pertinencia, arguyu d'identidá asturiana y asturianía».
Amás, el presidente destacó que l'alcuentru colos trés fundadores del discursu asturianista modernu ye nel despachu del presidente Belarmino Tomás, líder del Conseyu Soberanu d'Asturies y Llión na Guerra Civil, al ser «un espaciu bien simbólicu» onde se tomaron «alcuerdos importantes pa la historia d'Asturies». Nesi sentíu, llamó a reivindicar esa parte de la historia «ensin mieu».
«Microclima políticu de la M-30»
Per otru llau, Barbón afirmó qu'existe un problema nel Estáu «que ye'l microclima políticu alredor de la M-30» y que, al so xuiciu, ye «marcu xeneral» qu'afecta a munches comunidaes, mesmo a les que «paez que tienen más importancia y influencia» qu'Asturies.
Asina, ver lo que «pasa dientro de la M30» como «lo que pasa nel conxuntu del Estáu» ye un «defectu» pa Barbón. «Ye un marcu xeneral, porque la política mediática d'esti país va nesi sentíu, paez que quier que too xire, principie y acabe alredor d'esa M30, alredor de Madrid y yo contra eso rebélome tamién», señaló.
P'acabar, reclamó que n'Asturies la política «nun sía tóxica, que sía dialogada, que síamos capaces de construyir y de tender pontes». «Yo creo que la política asturiana ta a años lluz de lo que vemos n'otres partes, que son insultos, agresiones, agresividaes», sentenció, informa Europa Press.